चौतर्फी आलोचना र बदनाम बनेपछि बजगाईंले हटाए पोष्ट, कारवाहीका लागि कांग्रेसभित्र छलफल सुरु

काठमाडौ‌‌। विदेशमा कालो धन राख्ने ५५ नेपालीको सूचीमा परेका सांसद राजेन्द्र बजगाईँ पछिल्लो दिन पुनः चर्चामा छन् । पर्यटनमन्त्री बद्री पाण्डेले एक क्यासिनोलाई अनुमति दिन करोडौं घुस लिएको आरोप लगाएपछि उनी चर्चामा मात्र नभइ आलोचित समेत बनिरहेका छन् ।

मन्त्री पाण्डेमाथि तथ्यहीन र भ्रामक आरोप लगाएपछि उनीमाथि कारवाहीको तयारी समेत भइरहेको छ । पार्टी सभापति शेरबहादुर देउवा सुदुर पश्चिम यात्राबाट फर्किएलगत्तै पदाधिकारीको बैठकम बसेर उनीमाथि कारवाहीको प्रक्रिया अघि बढ्ने बताइएको छ । कारवाहीका विषयमा कांग्रेस महामन्त्री गगन थापा, मन्त्री पाण्डे, सांसद प्रतिमा गौतमलगायतका नेताहरुले बुधबार साँझ छलफल समेत गरिसकेका छन् ।

बजगाईंले मंगलबार फेसबुक र ट्वीटरमा केही काँग्रेस नेतालाई समेत जोडेर तथ्यहीन पोस्टहरु गरेपछि आलोचित भइरहेका छ । सोही पोष्टका आधारमा केही अनलाइन मिडियाहरुले समाचार प्रशारण गरेका गरेपछि उनी चर्चासँगै आलोचित बनेका हुन् । हेलिकोप्टरबाट विरामीको उद्धार गरेर समाचार लेखाउने, मिडिया स्टन्ट गर्ने र अतिरन्जित अभिव्यक्ति दिएर चर्चामा आइरहने उनी यस पटक वदनाम पात्र बनेका हुन् ।

सर्वत्र आलोचना हुन थालेपछि बजगाईले सामाजिक संजालमा रहेका सबै पोष्टहरु हटाएका छन् । यसबाट उनले लगाएको सो आरोपमा कुनै दम नभएको पुष्टि भएको पाण्डेका समर्थकहरुले बताएका छन् । सांसद बजगाईंले केही समय पहिले मदिरा सेवन गरी प्राइम टेलिभिजनमा अन्तर्वार्ता प्रशारण भए पनि उनले सो भिडियो हटाउन लगाएका थिए ।

आफ्नो अनुकुल काम नभए जस्तोसुकै हर्कत गर्न पछि नपर्ने बजगाईंको यस पटककको अभिव्यक्तिले राजनीतिक यात्रामै गम्भीर असर पुर्याएको छ । क्यासिनोको चलखेल, ट्याक्स हेभन देशमा रकम लुकाउनेदेखि कालो धनको चलखेल गर्ने गतिविधिले बदनामी कमाउँदै आएका उनी कहिले डा.शेखर कोइराला, कहिले आरजु राणा र कहिले गगन थापा निकटको भनेर आफूलाई प्रचार गर्दै आइरहेका थिए । तर देउवा, शेखर, गगनलगायतका नेताले कारवाहीको चेतावनी दिएपछि उनी घरको न घाटको स्थितिमा पुगेका छन् । चौतर्फी आलोचना र बदनाम बनेपछि उनले आफ्ना विवादस्पद पोष्टहरु हटाएका हुन् ।

आपराधिक गतिविधिलाई राजनीतिक संरक्षणका लागि काँग्रेसमा जोडिएको आरोप खेपिरहेका उनले मोटो रकम आरजु देउवालाई बुझाएर गोरखा १ बाट सांसदको टिकट किनेको आरोप समेत लाग्ने गरेको छ । मदिराले मातेको बेला बजगाँइले विगतमा पनि अन्टसन्ट पोष्ट गर्ने गरेको उनी निकटहरुले बताउने गरेका छन् । जसका कारण समाजसेवा गरेर बजगाईंले कमाएको प्रसंशा पनि ओझेल पर्ने अवस्थामा पुगेको छ ।

यता, मन्त्री पाण्डेले आरोपको कडा प्रतिकार गर्दै मानहानी, चरित्र हत्या, साइवर अपराध र पार्टीको विधान विपरित अनुशासनहीन अभिव्यक्ति दिएका विषयमा कानुनी उपचार खोज्ने तयारी गरिरहेको प्रतिक्रिया दिएका छन् ।

आफूले भैरहवास्थित गौतमबुद्ध अन्तर्राष्ट्रिय विमानस्थल सञ्चालन लगायत केही राम्रा कामको थालनी गरेपछि केही माफियाका मतियार आफ्ना विरुद्ध कोपोलकल्पित आरोप लगाउन उद्धत मन्त्री पाण्डेले भएको बताएका थिए । उनले आफूले कुनै कतै भ्रष्टाचार गरेको पुष्टि भए तत्कालै आफ्नो राजनीतिक जीवन तिलाञ्जली दिने प्रतिज्ञा पटकपटक दोहोयाएका थिए ।