नेपालको आर्थिक वृद्धि श्रीलंकाभन्दा मात्र माथि रहने प्रक्षेपण

काठमाडौं । अफगानिस्तानबाहेक दक्षिण एसियाको चालू आवमा ६ प्रतिशत आर्थिक वृद्धि हुँदा नेपाल ३ दशमलव ३ प्रतिशतमा र आगामी आवमा दक्षिण एसियाको ६ दशमलव १ प्रतिशत आर्थिक वृद्धि हुँदा नेपाल ४ दशमलव ६ प्रतिशतमा सीमित रहने भएको छ ।

विश्व बैंकले मंगलबार आर्थिक परिदृश्य सार्वजनिक गर्दै नेपालको आर्थिक वृद्धि श्रीलंकाभन्दा मात्र माथि रहने प्रक्षेपण गरेको हो ।

विश्व बैंकका अनुसार मालदिभ्सको चालू आवमा ४ दशमलव ७ प्रतिशत, श्रीलंकाको २ दशमलव २ प्रतिशत, बंगलादेशको ५ दशमलव ६ प्रतिशत, भुटानको ४ दशमलव ९ प्रतिशत र भारतको ७ दशमलव ५ प्रतिशतको आर्थिक वृद्धि हुनेछ । आगामी आवमा भने मालदिभ्सको ५ दशमलव २, श्रीलंकाको २ दशमलव ५, बंगलादेशको ५ दशमलव ७, भुटानको ५ दशमलव ७ र भारतको ६ दशमलव ६ प्रतिशतको आर्थिक वृद्धि हुनेछ ।

विश्व बैंकले चालू आवमा नेपालको ३ दशमलव ३ प्रतिशत मात्र आर्थिक वृद्धि हुने प्रक्षेपण गरेको हो । पर्यटन सेवा र औद्योगिक क्षेत्रको योगदानसहित ऊर्जा र विप्रेषणको क्षेत्रमा भएको सुधारलाई आधार मानेर विश्व बैंकले सो प्रक्षेपण गरेको हो ।

यसअघि गत असोजमा विश्व बैंकले चालू आवमा ३ दशमलव ९ प्रतिशत आर्थिक वृद्धि हुने प्रक्षेपण गरेको थियो । सरकारले भने चालू आवमा ६ प्रतिशत आर्थिक वृद्धिको लक्ष्य लिएको थियो । गत आवमा नेपालको आर्थिक वृद्धि १ दशमलव ९ प्रतिशत मात्र भएको थियो ।